Ommaviy oferta: jismoniy şaxslar uçun

Kirish

Ushbu hujjat (keyingi o'rinlarda - «Oferta» yoki «Shartnoma») «Ilminvest» («Ilm Invest») platformasi (https://ilminvest.e-investment.uz/ veb-sayti, uning subdomenlari, mobil ilovalari va unga aloqador dasturiy ta'minot) va u orqali ko'rsatiladigan barcha xizmatlar (keyingi o'rinlarda - «Platforma») dan jismoniy shaxslar tomonidan foydalanish shartlarini belgilaydi. Oferta «E-INVESTMENT» MChJ (keyingi o'rinlarda - «Operator») tomonidan har qanday jismoniy shaxsga - talaba, bitiruvchi yoki boshqa shaxsga (keyingi o'rinlarda - «Foydalanuvchi») yo'naltirilgan ommaviy taklif hisoblanadi.

Ushbu Oferta O'zbekiston Respublikasi Fuqarolik kodeksining 367-moddasi (oferta), 369-moddasi (ommaviy oferta) va 370-moddasi (aksept) talablariga muvofiq tuzilgan bo'lib, qog'ozda imzolashni talab qilmaydi va elektron shaklda amal qiladi. Ofertani qabul qilish (aksept) unda ko'rsatilgan shartlar bo'yicha yozma shartnoma tuzishga tengdir.

DIQQAT! Platformadan foydalanishni boshlashdan avval ushbu Oferta matni bilan to'liq tanishib chiqing. Ro'yxatdan o'tish shaklida rozilik belgisini qo'yib «Davom etish» tugmasini bosish, «LinkedIn bilan davom etish» yoki «Google bilan davom etish» orqali kirish yoki Platformadan amalda foydalanishni boshlash - Foydalanuvchi tomonidan ushbu Ofertaning barcha shartlariga to'liq va so'zsiz rozilik bildirilganini (aksept) anglatadi. Agar Foydalanuvchi Oferta shartlarining birortasiga rozi bo'lmasa, u ro'yxatdan o'tmasligi va Platformadan foydalanmasligi lozim.

Operator ushbu Oferta shartlarini ushbu Ofertaning 22-bo'limida belgilangan tartibda o'zgartirish huquqini o'zida saqlab qoladi. «Shartnoma», «Oferta», «ushbu Oferta» atamalari bir xil ma'noga ega.

1. Atamalar va ta'riflar

Ushbu Ofertada qo'llaniladigan atamalar, agar matndan boshqacha ma'no kelib chiqmasa, quyidagi ma'nolarni anglatadi:

Operator - Platformaga egalik qiluvchi, uni boshqaruvchi va xizmatlarni taqdim etuvchi «E-INVESTMENT» mas'uliyati cheklangan jamiyati; ushbu Ofertani e'lon qilgan tomon (oferent). Rekvizitlari 23-bo'limda keltirilgan.

Platforma («Ilminvest») - https://ilminvest.e-investment.uz/ manzilidagi veb-sayt, uning subdomenlari, mobil ilovalari (AppStore va Play Market), API va boshqa dasturiy ta'minoti majmui.

Foydalanuvchi - Platformada «Jismoniy shaxs» sifatida ro'yxatdan o'tgan yoki undan foydalanayotgan talaba, bitiruvchi yoki boshqa jismoniy shaxs.

Talaba - oliy ta'lim muassasasida (OTM) ta'lim olayotganini profilida ko'rsatgan Foydalanuvchi.

Yuridik shaxs foydalanuvchi (Kompaniya, Ish beruvchi) - «Yuridik shaxs» sifatida ro'yxatdan o'tgan, vakansiyalar joylaydigan, nomzodlarni ko'radigan va kompaniya sahifasini yurituvchi tashkilot.

OTM - Platformaning «Universitetlar» katalogiga kiritilgan oliy ta'lim muassasasi. OTM hisoblarini Operator o'zi ochadi.

Investor - startaplarga yoki talabalar ta'limiga mablag' kiritish maqsadida Platformadan foydalanuvchi shaxs.

Akkaunt (hisob) - Foydalanuvchining Platformadagi shaxsiy kabineti; unga login va parol yoki tashqi avtorizatsiya (LinkedIn, Google) orqali kiriladi.

Profil - Foydalanuvchi o'zi haqida kiritgan va Platformada boshqalarga ko'rsatiladigan ma'lumotlar sahifasi («Umumiy», «Tajriba», «Ta'lim», «Ilmiy va loyihalar», «Maxfiylik» bo'limlari).

Kompetensiya pasporti - Foydalanuvchining bilim, loyiha va yutuqlari tasdiqlangan holda jamlangan raqamli profili.

Kompetensiya indeksi (Moslik ko'rsatkichi) - akademik natija, loyihalar, sertifikatlar, til darajasi va boshqa ma'lumotlar asosida algoritm hisoblaydigan, tavsiyaviy xarakterdagi ko'rsatkich.

Aksept - shaxsning ushbu Ofertaga qo'shilish uchun harakatlarni amalga oshirish orqali ofertani to'liq va so'zsiz qabul qilishi.

Kontent - matn, rasm, video, audio, havola, teg, izoh, xabar, fayl va Foydalanuvchi Platformaga joylaydigan boshqa materiallar.

Post - «Lenta»da e'lon qilinadigan Kontent birligi (oddiy post, savol, havola, shablonli post).

Lenta - Postlar oqimi ko'rsatiladigan bo'lim.

Vakansiya - Platformada joylangan yoki tashqi manbalardan yig'ilgan ish, amaliyot yoki loyiha e'loni.

Ariza - Foydalanuvchining vakansiya, startapdagi ochiq rol yoki boshqa imkoniyatga yuborgan murojaati.

Taklif - Ish beruvchi, startap yoki boshqa foydalanuvchining Foydalanuvchiga yuborgan ish yoki hamkorlik taklifi.

Kelishuv (uch tomonlama kelishuv) - Talaba, Ish beruvchi va OTM o'rtasida Platforma orqali tayyorlanadigan, ta'limni moliyalashtirish va kelajakdagi ish majburiyatlarini belgilaydigan alohida shartnoma.

Startap - Foydalanuvchilar Platformada yaratadigan loyiha sahifasi: g'oya, asoschi, jamoa, bosqich, tayyorlik indeksi, ochiq rollar va moliyaviy ma'lumotlar bilan.

Startap egasi (asoschi) - Startap sahifasini yaratgan yoki uni boshqarish huquqiga ega Foydalanuvchi.

Ochiq (vakant) rol - Startap jamoasiga qo'shilish uchun e'lon qilingan lavozim, uning talablari va shartlari.

Tayyorlik indeksi - Startap sahifasi bo'limlarining to'ldirilganlik darajasini foizda ko'rsatuvchi avtomatik ko'rsatkich.

Kraudfanding - Startap uchun ko'plab shaxslardan mablag' yig'ish xizmati.

XP (tajriba ballari) - Platformadagi faollik uchun avtomatik beriladigan virtual ballar. XP pul qiymatiga ega emas.

Daraja, reyting, nishon - XP asosida shakllanadigan, Foydalanuvchining faolligi va yutuqlarini aks ettiruvchi virtual ko'rsatkichlar (Bronza, Kumush, Oltin darajalari).

AI yordamchi - sun'iy intellekt asosidagi maslahatchi, chatbot va matn tavsiyalari funksiyalari.

Tashqi xizmatlar - LinkedIn, Google, ORCID, Telegram, Osonish, ish.mehnat.uz, vacancy.gov.uz, gov.uz, HackFinder, studyinuzbekistan.uz va boshqa uchinchi shaxslar resurslari.

Moderatsiya - Operator tomonidan Kontent, profillar, startaplar va boshqa materiallarning qoidalarga muvofiqligini tekshirish jarayoni (avtomatik va/yoki qo'lda).

Shaxsga doir ma'lumotlar - muayyan jismoniy shaxsga taalluqli yoki uni identifikatsiya qilish imkonini beruvchi har qanday axborot.

Maxfiylik siyosati - Operator tomonidan alohida tasdiqlanadigan va ushbu Ofertaning ajralmas qismi bo'lgan hujjat.

Rasmiy manba - Platformaning rasmiy veb-sayti: https://ilminvest.e-investment.uz/ Ofertada ta'riflanmagan atamalar O'zbekiston Respublikasi qonunchiligiga va Platformadagi odatiy ma'nosiga muvofiq talqin qilinadi.

2. Umumiy qoidalar

2.1. Ushbu Oferta O'zbekiston Respublikasining Fuqarolik kodeksi, «Elektron tijorat to'g'risida»gi, «Shaxsga doir ma'lumotlar to'g'risida»gi, «Axborotlashtirish to'g'risida»gi, «Elektron hujjat aylanishi to'g'risida»gi, «Iste'molchilarning huquqlarini himoya qilish to'g'risida»gi, «Mualliflik huquqi va turdosh huquqlar to'g'risida»gi qonunlari hamda boshqa qonunchilik hujjatlariga muvofiq tuzilgan.

2.2. Quyidagi harakatlardan birinchisi bajarilgan paytda Oferta akseptlangan hisoblanadi:

• ro'yxatdan o'tish shaklida rozilik belgisini qo'yib, «Davom etish» yoki «Ro'yxatdan o'tish» tugmasini bosish;
• «LinkedIn bilan davom etish» yoki «Google bilan davom etish» orqali birinchi marta kirish;
• Akkauntga kirgan holda Platforma funksiyalaridan foydalanishni boshlash.

2.3. «Ro'yxatdan o'tmasdan demoni ko'rish» rejimida Platformani ko'rib chiqish ham Ofertaning 14, 15 va 20-bo'limlariga rozilik hisoblanadi.

2.4. Ofertaning ajralmas qismlari: Maxfiylik siyosati («Maxfiylik» havolasi), Foydalanish shartlari («Shartlar» havolasi) va Platformada alohida e'lon qilinadigan funksiya qoidalari (masalan, tanlov yoki kraudfanding shartlari). Ular o'rtasida ziddiyat bo'lsa, muayyan funksiya qoidalari, so'ngra ushbu Oferta ustun turadi.

2.5. Uch tomonlama kelishuv, ish shartnomasi, startapdagi hamkorlik yoki investitsiya shartnomasi kabi Foydalanuvchilar o'rtasidagi bitimlar ushbu Oferta predmetiga kirmaydi. Ular tomonlar o'rtasida alohida tuziladi.

2.6. Platforma interfeysi o'zbek tilida (lotin yozuvi) va boshqa tillarda («UZ» tanlagichi orqali) taqdim etilishi mumkin. Oferta matnlari o'rtasida farq bo'lsa, o'zbek tilidagi matn ustun turadi.

2.7. Elektron shaklda (Platforma interfeysi, elektron pochta, bildirishnoma) yuborilgan xabarlar va bosilgan tugmalar yozma shaklga tenglashtiriladi va dalil sifatida tan olinadi.

3. Ofertaning predmeti

3.1. Ushbu Oferta predmeti - Operator tomonidan Foydalanuvchiga Platformadan Oferta shartlariga muvofiq «boricha» (as is) foydalanish huquqini berish, Foydalanuvchi esa ushbu shartlarga rioya qilish majburiyatini olishidir.

3.2. Jismoniy shaxslar uchun Platforma quyidagi bo'lim va xizmatlarni o'z ichiga oladi:

• Lenta - post, savol, havola, teglar, shablonlar, reaksiya, izoh, ulashish, «LinkedIn'ga ham» joylash, «Ulashish tavsiyasi» (6-bo'lim);
• Universitetlar - 400 dan ortiq OTM katalogi, OTM sahifalari, yo'nalishlar, aloqa, foto va video, obuna (7-bo'lim);
• A'zolar - «Sizga mos» va «Katalog», kuzatish, xabar yozish, o'xshash profillar (7-bo'lim);
• Vakansiyalar - «Siz uchun», «Hammasi», «Saqlanganlar»; platforma, davlat va xususiy ishlar; tashqi manbalardagi e'lonlar (8-bo'lim);
• Arizalarim - mening arizalarim, menga kelgan arizalar va takliflar, holat shkalasi (8-bo'lim);
• Startaplar - katalog, vakant rollar, mening startaplarim, mening arizalarim, kraudfanding, mentor, oylik hisobot (9-bo'lim);
• Tanlovlar va tadbirlar - «Siz uchun», platforma tadbirlari, tashqi tanlovlar: hakatonlar, startap dasturlari, IT-tanlovlar (10-bo'lim);
• Xabarlar - shaxsiy va guruh suhbatlari, fayl, ovozli xabar, emoji, qidiruv (11-bo'lim);
• Fikr bildirish - taklif, shikoyat, xato, savol, rahmat, Platformani baholash (11-bo'lim);
• Progress - XP, darajalar, kunlik kirish, seriya, kunlik maqsad, reyting, nishonlar, XP tarixi (12-bo'lim);
• Profil - ta'lim, tajriba, ish shartlari, sertifikatlar, ko'nikmalar, tillar, yutuqlar, ilmiy ishlar, startaplar, rezyume, LinkedIn integratsiyasi, do'stlarni taklif qilish (5 va 12-bo'limlar);
• Sozlamalar - hisob, apellyatsiyalar, faol qurilmalar, tavsiya va maxfiylik sozlamalari, ma'lumotlarni yuklab olish, hisobni o'chirish (13, 17 va 22-bo'limlar);
• AI yordamchi - Platforma bo'yicha maslahat, matn va post tavsiyalari (11-bo'lim);
• Qidiruv va bildirishnomalar - odamlar, postlar va mavzular bo'yicha qidiruv, bildirishnomalar.

3.3. Operator Platforma funksiyalarini qo'shishi, o'zgartirishi yoki to'xtatishi mumkin. Yangi funksiyalarga ham ushbu Oferta tatbiq etiladi.

3.4. Platforma axborot-vositachilik maydoni hisoblanadi. Operator ish beruvchi, OTM, investor yoki ta'lim muassasasi emas va Foydalanuvchiga ish, grant, investitsiya, tanlovda g'alaba yoki boshqa natijani kafolatlamaydi.

4. Ro'yxatdan o'tish va akkaunt

4.1. Ro'yxatdan o'tish 4 bosqichdan iborat. Birinchi bosqichda Foydalanuvchi «Jismoniy shaxs» maqomini tanlaydi. Jismoniy shaxs akkaunti ro'yxatdan o'tgach darhol faollashadi.

4.2. Platformaga kirish usullari:

• elektron pochta va parol;
• «LinkedIn bilan davom etish»;
• «Google bilan davom etish».

4.3. Tashqi xizmat orqali kirilganda Operator ushbu xizmat bergan ma'lumotlarni (ism, familiya, elektron pochta, rasm, LinkedIn profilidagi ma'lumotlar) Foydalanuvchi ruxsat bergan hajmda oladi. Tashqi xizmatlarning ishlashi ularning o'z qoidalari bilan tartibga solinadi.

4.4. Platformadan 18 yoshga to'lgan shaxslar foydalanishi mumkin. 16 yoshdan 18 yoshgacha bo'lgan shaxslar faqat ota-onasi yoki qonuniy vakilining roziligi bilan foydalanishi mumkin; bunda Platforma orqali tuziladigan mehnat, kelishuv yoki investitsiya bitimlari qonunchilikda belgilangan tartibda qonuniy vakil roziligi bilan amalga oshiriladi. 16 yoshga to'lmagan shaxslarning ro'yxatdan o'tishi taqiqlanadi.

4.5. Foydalanuvchi ro'yxatdan o'tishda va Profilda haqqoniy, to'liq va dolzarb ma'lumot kiritishi shart. Boshqa shaxs nomidan, soxta ism bilan yoki bir nechta jismoniy shaxs akkauntini ochish taqiqlanadi.

4.6. Foydalanuvchi nomi (username) 3-30 belgidan iborat bo'lishi, faqat lotin harflari, raqamlar, «-» va «_» belgilaridan tashkil topishi kerak. U profil havolasida ishlatiladi (masalan, ilminvest.e-investment.uz/u/username). Boshqa shaxs, brend, OTM yoki davlat organini anglatuvchi, haqoratli yoki chalg'ituvchi nomlarni Operator o'zgartirishni talab qilishi yoki o'zi o'zgartirishi mumkin.

4.7. Foydalanuvchi parol va kirish vositalarining maxfiyligini saqlash uchun javobgar. Akkauntdan qilingan barcha harakatlar Foydalanuvchining o'zi tomonidan qilingan deb hisoblanadi. Ruxsatsiz kirish holatida Foydalanuvchi zudlik bilan parolni almashtirishi, «Faol qurilmalar» bo'limida begona seanslarni chiqarishi va Operatorga xabar berishi kerak.

4.8. «Parolni unutdingizmi?» funksiyasi orqali parolni tiklash faqat ro'yxatdan o'tgan elektron pochta orqali amalga oshiriladi.

4.9. «Ro'yxatdan o'tmasdan demoni ko'rish» rejimida ko'rsatiladigan ma'lumotlar namunaviy bo'lishi mumkin. Bu rejimda arizalar, xabarlar va postlar yuborib bo'lmaydi.

4.10. Yuridik shaxs akkauntlari (Kompaniya kabineti) alohida qoidalar bilan tartibga solinadi. Kompaniya sahifasi Operator tasdiqlagandan so'ng hammaga ko'rinadi. Jismoniy shaxs bitta akkaunt doirasida kompaniya kabinetiga ham ega bo'lishi mumkin, ammo kompaniya nomidan qilingan harakatlarga yuridik shaxs qoidalari tatbiq etiladi.

5. Profil va kompetensiya pasporti

5.1. Foydalanuvchi Profilda quyidagi bloklarni to'ldirishi mumkin: profil va muqova rasmi, ism, sarlavha, «O'zim haqimda», joylashuv, tug'ilgan sana, qiziqishlar, ish va amaliyot tajribasi, ish shartlari, ta'lim, sertifikatlar, ko'nikmalar, tillar, yutuqlar, ilmiy ishlar, startaplar, rezyume, ijtimoiy tarmoq havolalari (Telegram, LinkedIn, GitHub, veb-sayt va boshqalar).

5.2. Profil ma'lumotlarining ko'rinish darajalari:

• tug'ilgan sana faqat Foydalanuvchining o'ziga ko'rinadi («faqat siz ko'rasiz»);
• «Ish shartlari» bloki (format, haftalik soat, eng kam haq, to'lov turi, hudud) faqat Foydalanuvchi «Takliflarga ochiq» holatini yoqqanda va faqat tasdiqlangan ish beruvchilarga ko'rinadi; investorlar bu blokni ko'rmaydi;
• boshqa bloklar Platformaning barcha ro'yxatdan o'tgan foydalanuvchilariga, ommaviy profil havolasi orqali esa internetdagi har qanday shaxsga ko'rinishi mumkin;
• «Maxfiylik» bo'limida Foydalanuvchi ayrim bloklarning ko'rinishini cheklashi mumkin.

5.3. Foydalanuvchi o'z holatini tanlaydi: «Takliflarga ochiq», «Jamoaga ochiq» va boshqalar. Holat tavsiyalarga va ish beruvchilarga ko'rinishga ta'sir qiladi.

5.4. Profil to'liqligi foizda hisoblanadi (Boshlang'ich, Faol, Ishonchli, Namunaviy darajalari) va har bir to'ldirilgan blok belgilangan foizni beradi. Bu ko'rsatkich faqat ma'lumot uchun va tavsiyalarda ishlatiladi.

5.5. Ta'lim muassasasi va ilmiy ishlar bo'yicha ma'lumotlar OTM tomonidan tasdiqlanishi mumkin (yashil «tasdiqlangan» belgisi).

OTM tasdig'i OTMning o'z qarori bo'lib, Operator uni kafolatlamaydi. Soxta ma'lumot aniqlansa, tasdiq bekor qilinadi va 16-bo'limdagi choralar qo'llanadi.

5.6. Foydalanuvchi ilmiy ishlarni DOI orqali (ma'lumot avtomatik to'ladi), ORCID iD orqali import qilib yoki qo'lda qo'shishi mumkin. ORCID'dan import qilingan ishlar profilga qo'shiladi, ammo OTM tasdig'ini kutadi; Foydalanuvchi ismi ORCID profilidagi ism bilan mos bo'lishi kerak. Faqat Foydalanuvchining o'zi muallif yoki hammuallif bo'lgan ishlar qo'shilishi mumkin. «Ilmiy faollik balli» (0-100) va iqtiboslar soni ma'lumot uchun ko'rsatiladi.

5.7. Sertifikat (masalan, IELTS, CEFR) yoki yutuq qo'shilganda Foydalanuvchi uning haqiqiyligi uchun javobgar. Operator yoki OTM tasdiqlovchi hujjat yoki ID raqamini so'rashi mumkin. ID raqamlari boshqalarga qisman yashirilgan holda ko'rsatilishi mumkin.

5.8. Foydalanuvchi LinkedIn akkauntini ulab, «LinkedIn'dan to'ldirish» (profil ma'lumotlarini import qilish), «Profilni LinkedIn'da ulashish» va postlarni LinkedIn'ga ham joylash funksiyalaridan foydalanishi mumkin. Ruxsat LinkedIn belgilagan cheklangan muddatga (odatda 60 kun) beriladi. Foydalanuvchi «Sozlash» yoki «Uzish» orqali ulanishni istalgan vaqtda bekor qilishi mumkin.

Import qilingan ma'lumotlarning to'g'riligi uchun Foydalanuvchi javobgar.

5.9. «Rezyumeni yuklab olish» funksiyasi Profil ma'lumotlari asosida rezyume faylini yaratadi. Fayl mazmuni Foydalanuvchi kiritgan ma'lumotlarga bog'liq.

5.10. Kompetensiya indeksi algoritm orqali hisoblanadi, tavsiyaviy xarakterga ega va ish beruvchi yoki OTM uchun majburiy emas.

Indeksni hisoblash usuli Platformada umumiy tarzda tushuntiriladi. Foydalanuvchi uni 16-bo'limdagi apellyatsiya tartibida shubha ostiga olishi mumkin.

5.11. Har bir Foydalanuvchiga nusxa olinadigan ommaviy profil havolasi beriladi. Foydalanuvchi uni ijtimoiy tarmoqlarda tarqatishi mumkin.

6. Lenta va postlar

6.1. «Yangi post» oynasida Foydalanuvchi quyidagilarni qo'shishi mumkin:

• matn («Nima yangilik?», «Bugun nimani o'rgandingiz?»);
• Rasm - Foydalanuvchiga tegishli yoki foydalanish huquqi bo'lgan tasvirlar;
• Savol - post «Savol» belgisi bilan chiqadi va javoblar «Javob» sifatida qoldiriladi;
• Havola - tashqi sahifaga havola (Platforma uning mazmuni uchun javob bermaydi);
• Teglar - mavzu belgilari (#frontend, #karyera va h.k.);
• Shablon - Platforma taklif qiladigan tayyor dizayn («Yangi jamoa», «Yangi ish» va boshqalar).

6.2. Foydalanuvchi «LinkedIn'ga ham» tugmasini yoqsa, post ulangan LinkedIn akkauntida ham avtomatik joylanadi. Joylangan post LinkedIn qoidalariga bo'ysunadi; uni LinkedIn'dan o'chirish Foydalanuvchining o'zi zimmasida.

6.3. Platforma Profildagi yangiliklar (masalan, startap jamoasiga qo'shilish, yangi ish) asosida post matni va rasmini avtomatik tayyorlashi mumkin («Ulashish tavsiyasi»). Tavsiya Foydalanuvchi «Ulashish» tugmasini bosmaguncha e'lon qilinmaydi.

Foydalanuvchi uni «Tahrirlash» yoki «Keyinroq» tanlashi mumkin. E'lon qilingan matn uchun Foydalanuvchi javobgar.

6.4. Lenta «Hammasi», «OTM'im», «Yo'nalishim», «Kuzatganlarim» filtrlari va «Savollar», «Rasmiy e'lonlar», «Tadbirlar», «Media», «Muhim» toifalari bo'yicha ko'rsatiladi. Postlar tartibi algoritm bilan belgilanadi (yangilik, faollik, moslik, obunalar). «Rasmiy e'lonlar» va tasdiqlangan belgisi faqat OTM, Operator yoki tasdiqlangan kompaniyalarga beriladi.

6.5. Foydalanuvchi postlarga reaksiya bildirishi («Yoqdi», «Foydali» va boshqalar), izoh qoldirishi, ulashishi hamda «...» menyusi orqali shikoyat qilishi, muallif yoki tegni yashirishi mumkin. Ko'rishlar, reaksiyalar va izohlar soni hammaga ko'rinadi.

6.6. Muallif o'z postini tahrirlashi (bunda post «tahrirlangan» deb belgilanadi) va o'chirishi mumkin. O'chirilgan post boshqa foydalanuvchilar ulashgan nusxalar yoki skrinshotlarda saqlanib qolishi mumkin.

6.7. Postlar ommaviy xarakterga ega. Foydalanuvchi post orqali o'z shaxsiy ma'lumotlarini (telefon, manzil, hujjat raqamlari) va boshqa shaxslarning ma'lumotlarini ularning roziligisiz e'lon qilmasligi kerak.

6.8. Tijorat maqsadidagi postlar (xizmat, mahsulot reklamasi) faqat Operator belgilagan tartibda va «Reklama to'g'risida»gi qonun talablariga muvofiq joylanadi. Yashirin reklama, spam va bir xil postni takror joylash taqiqlanadi.

6.9. «Sizga o'xshash odamlar» va «Faol muhokamalar» bloklari algoritm asosida shakllanadi va tavsiyaviy xarakterga ega.

7. Universitetlar va A'zolar

7.1. «Universitetlar» bo'limida O'zbekistondagi OTMlar (davlat, xususiy, xorijiy filiallar) hududlar bo'yicha filtrlanadi, nom yoki qisqartma bo'yicha qidiriladi. OTM sahifasida talabalar, o'qituvchilar, fakultetlar, kafedralar soni, «Universitet haqida», ta'lim shakli, yo'nalishlar (kodi va darajasi bilan), aloqa ma'lumotlari, xarita, foto va video hamda Platformadagi postlar ko'rsatiladi.

7.2. OTMlar haqidagi rasmiy ma'lumot ochiq manbalardan (masalan, studyinuzbekistan.uz, OTMlarning rasmiy saytlari) olinadi va manbasi ko'rsatiladi. Operator ma'lumotlarning to'liqligi va dolzarbligini kafolatlamaydi. Qabul, kontrakt narxi, yo'nalishlar va muddatlarni Foydalanuvchi OTMning rasmiy saytida tekshirishi shart.

7.3. «Tasdiqlangan» belgisi OTM sahifasini OTMning o'zi yoki Operator tasdiqlaganini bildiradi. OTM sahifasiga «Obuna bo'lish» Foydalanuvchiga OTM postlarini Lentada ko'rish imkonini beradi.

7.4. OTM sahifalarini OTM vakillari boshqaradi. OTM e'lonlari, tadbirlari va ma'lumotlari uchun OTM javobgar.

7.5. «A'zolar» bo'limida Platformadagi talabalar, xodimlar va tashkilot vakillari ko'rsatiladi:

• «Sizga mos» - «Yangi qo'shilganlar», «Sizning OTMingizdan», «Boshqa OTMlardan, sizga o'xshash» bloklari algoritm asosida shakllanadi;
• «Katalog» - barcha a'zolar ro'yxati va qidiruv.

7.6. Foydalanuvchi boshqa a'zolarni «Kuzatish», ularga «Xabar yozish» hamda «...» menyusi orqali shikoyat qilish yoki yashirish imkoniyatiga ega. Kuzatuvchilar (obunachilar) va obunalar soni profilda ko'rinadi.

7.7. «Meni boshqalarga tavsiya qilish» sozlamasi (13-bo'lim) Foydalanuvchining «Sizga mos» va «Shunga o'xshash profillar» bloklarida ko'rinishini boshqaradi.

7.8. A'zolar ma'lumotlarini avtomatlashtirilgan usulda yig'ish (skreping), ro'yxatlarni eksport qilish, ularni reklama yoki spam maqsadida ishlatish taqiqlanadi.

8. Vakansiyalar, arizalar, takliflar va kelishuvlar

8.1. «Vakansiyalar» bo'limi amaliyot, rasmiy ish va loyihalarni ko'rsatadi:

• «Siz uchun» - Profil va «Ish shartlari»ga eng mos e'lonlar (kurs, soat, format, to'lov turi bo'yicha);
• «Hammasi» - barcha e'lonlar; «Saqlanganlar» - Foydalanuvchi saqlagan e'lonlar;
• «Platforma», «Davlat ishlari», «Xususiy ishlar» filtrlari.

8.2. «Sizga mos: boshqa manbalardan» blokida ish.mehnat.uz, Osonish, vacancy.gov.uz, gov.uz va Telegram kanallaridan avtomatik yig'ilgan e'lonlar «Manba: ...» belgisi bilan ko'rsatiladi. «Manbada ariza berish» tugmasi Foydalanuvchini tashqi saytga yo'naltiradi

va ariza o'sha manbada, uning qoidalari bo'yicha beriladi. Operator tashqi e'lonlarning haqqoniyligi, maoshi, dolzarbligi va ish beruvchining vijdonliligi uchun javob bermaydi.

8.3. Platformadagi vakansiyalarni tasdiqlangan ish beruvchilar joylaydi va ular e'londagi ma'lumotlar hamda mehnat qonunchiligiga rioya etilishi uchun javobgar. Ish beruvchi ish uchun Foydalanuvchidan pul talab qilsa, Foydalanuvchi bu haqda zudlik bilan shikoyat qilishi kerak.

8.4. «Arizalarim» bo'limi arizalar, so'rovlar va takliflarni bitta ro'yxatda, bir xil holat shkalasi bilan ko'rsatadi:

• «Mening arizalarim» va «Menga kelgan arizalar» (masalan, startapingizdagi rolga kelganlar);
• turlar: Ish, Ochiq rol, Startap, Investitsiya, Menga kelgan takliflar;
• «Faol» va «Tugagan» filtrlari.

8.5. Ariza holatlari: «yuborildi», «ko'rildi», «qabul qilindi», «kelishildi», «rad etildi», «qaytarib olindi». Har bir holat o'zgarish sanasi bilan saqlanadi va ikkala tomonga ko'rinadi.

8.6. Bir vaqtning o'zida faol arizalar soni cheklangan (hozirda 10 ta). Limit sifatli arizalarni rag'batlantirish uchun belgilangan va Operator tomonidan o'zgartirilishi mumkin. Ariza yakunlangach yoki qaytarib olingach, limit bo'shaydi.

8.7. Foydalanuvchi faol arizani yakuniy qaror qabul qilinguncha qaytarib olishi mumkin. «Kelishildi» holatidagi arizani qaytarib olish tomonlar o'rtasidagi kelishuv shartlariga bo'ysunadi.

8.8. Arizaga Profil ma'lumotlari, rezyume va ilova qilingan xabar biriktiriladi. Foydalanuvchi ariza yuborish orqali ushbu ma'lumotlarni qabul qiluvchiga (ish beruvchi, startap asoschisi, investor) uzatishga rozilik beradi.

8.9. Moslik ko'rsatkichi va tavsiyalarni algoritm hisoblaydi, ammo nomzodni tanlash yoki rad etish to'g'risidagi qarorni ish beruvchi yoki boshqa tomon o'zi qabul qiladi. Foydalanuvchi faqat avtomatlashtirilgan ishlov asosida qabul qilingan qarorga e'tiroz bildirish huquqiga ega.

8.10. Platforma Talaba, Ish beruvchi va OTM o'rtasida uch tomonlama kelishuv tuzish imkonini berishi mumkin.

Unga ko'ra ish beruvchi Talaba ta'limini moliyalashtiradi, Talaba esa bitirgach belgilangan muddat ish beruvchida ishlash majburiyatini oladi. Bunda:

• kelishuv shartlari (summa, muddat, ish majburiyati, to'lovlarni qaytarish tartibi) kelishuvda oldindan, aniq ko'rsatiladi;
• kelishuv alohida hujjat sifatida, uchala tomon roziligi bilan tuziladi va ushbu Oferta uning shartlarini almashtirmaydi;
• Operator kelishuv tomoni emas va uning bajarilishini kafolatlamaydi, lekin kelishuvni tuzish, kuzatish va hujjatlashtirish uchun texnik vosita taqdim etadi;
• majburiyatni bajara olmaslik oqibatlari kelishuvning o'zida belgilanadi;
• 18 yoshga to'lmagan Foydalanuvchi kelishuvni faqat qonuniy vakili roziligi bilan tuzadi.

8.11. Platforma orqali topilgan ish bo'yicha mehnat munosabatlari Foydalanuvchi va ish beruvchi o'rtasida O'zbekiston Respublikasining Mehnat kodeksiga muvofiq yuzaga keladi. Operator ish beruvchi yoki xususiy bandlik agentligi hisoblanmaydi.

9. Startaplar, ochiq rollar, kraudfanding va investitsiya

9.1. Foydalanuvchi «Startap ochish» orqali startap sahifasi yaratishi mumkin: nomi, logotipi, muqovasi, qisqa tavsifi («G'oya»), loyiha haqida, muammo va yechim, soha, hudud, model (B2C, B2B va h.k.), OTM. Yaratuvchi startapning asoschisi hisoblanadi.

Yuborilgan startap darhol katalogda chiqadi.

9.2. Startap bosqichlari: G'oya, MVP, Jamoa va tekshiruv, Investitsiya raundi va boshqalar. Bosqichni asoschi belgilaydi va startap katalogda shu bosqich bo'yicha topiladi. «Bosqichni o'zgartirish» va «So'rov yuborish» funksiyalari orqali yuqori bosqichlarga o'tish Operator yoki OTM tekshiruvini talab qilishi mumkin.

9.3. Tayyorlik indeksi startap sahifasi bo'limlarining to'ldirilganligini (Karta, Jamoa, Mijozlar, Mahsulot, Daromad va boshqalar) foizda ko'rsatadi. U loyiha sifati, qiymati yoki investitsiyaga yaroqliligini baholamaydi. «Kun startapi» tanlovi tahririyat yoki algoritm qaroriga ko'ra amalga oshiriladi.

9.4. Asoschi jamoa a'zolarini qo'shadi va ochiq rollarni (lavozim, haftalik soat) e'lon qiladi. Foydalanuvchi «Vakant rollar» bo'limidan rolga ariza yuboradi; asoschi arizani qabul qilishi yoki rad etishi mumkin. Jamoaga qo'shilish Foydalanuvchining profilida va Lentada aks etishi mumkin.

9.5. Startap ulushi, mehnatga haq to'lash, intellektual mulk va maxfiylik (NDA) masalalari asoschi va jamoa a'zolari o'rtasida alohida yozma shartnoma bilan hal qilinadi. Operator ushbu munosabatlarga aralashmaydi va ular uchun javob bermaydi.

Foydalanuvchilarga bunday shartnomani jamoaga qo'shilishdan oldin tuzish tavsiya etiladi.

9.6. Asoschi har oyning 5-sanasigacha oylik hisobot yozadi. Hisobotning ochiq qismi hammaga ko'rinadi; yopiq qismi (daromad, foydalanuvchilar soni) faqat jamoa va startapni kuzatayotgan investorlar uchun ochiq. Asoschi hisobotdagi ma'lumotlarning haqqoniyligi uchun javobgar.

9.7. «Mentor tanlash» orqali Foydalanuvchi ish beruvchi xodimlaridan maslahat uchrashuvini so'rashi mumkin. Mentorlik ixtiyoriy; mentor maslahati uning shaxsiy fikri bo'lib, kafolat hisoblanmaydi.

9.8. Asoschi startapni tahrirlashi, «Yopish» (katalogdan olib tashlash) yoki «O'chirish» mumkin. O'chirish jamoa a'zolarini oldindan ogohlantirib amalga oshiriladi. Startap guruh suhbati va jamoa a'zolarining profilidagi yozuvlar saqlanib qolishi mumkin.

9.9. Kraudfanding funksiyasi (u ishga tushirilganda) quyidagi tamoyillar asosida ishlaydi:

• pul Platforma hisobidan o'tmaydi: mablag'lar hamkor bankning maxsus hisobida saqlanadi va belgilangan shartlar bajarilganda (masalan, OTM semestr natijasini tasdiqlaganda) o'tkaziladi;
• maqsad, yig'im muddati, mablag'dan foydalanish rejasi va qaytarish shartlari oldindan e'lon qilinadi;
• har bir kraudfanding loyihasi alohida qoidalar bilan tartibga solinadi va unda ishtirok etish uchun qo'shimcha rozilik olinadi;
• mablag' kiritish xavf bilan bog'liq: loyiha muvaffaqiyatsiz bo'lishi va mablag' qaytarilmasligi mumkin.

9.10. Investor bilan uchrashuv, NDA va investitsiya shartlari bo'yicha muzokaralar tomonlar o'rtasida o'tkaziladi. Platforma faqat tanishuv va ma'lumot almashish vositasi. Operator investitsiya maslahatchisi, broker yoki moliyaviy vositachi emas va investitsiya tavsiyasi bermaydi. Qimmatli qog'ozlar yoki ulushlarni jalb qilish qonunchilikda belgilangan tartibda amalga oshiriladi.

9.11. Startap sahifasida soxta ma'lumot (soxta mijozlar, daromad, hamkorlar, mukofotlar) joylash va investorlarni chalg'itish taqiqlanadi va qonunchilikka muvofiq javobgarlikka sabab bo'ladi.

10. Tanlovlar va tadbirlar

10.1. «Tanlovlar va tadbirlar» bo'limi uch qismdan iborat:

• «Siz uchun» - Profilga mos tadbir va tanlovlar;
• «Platforma tadbirlari» - Operator, OTMlar va hamkorlar Platformada joylagan tanlov, hakaton va tadbirlar;
• «Tashqi tanlovlar» - O'zbekiston va xalqaro hakatonlar, startap dasturlari va IT-tanlovlar; ular tashqi agregatordan (hozirda HackFinder) olinadi va ro'yxat taxminan har 15 daqiqada yangilanadi.

10.2. Filtrlar: holat (Ochiq, O'tgan, Barchasi), hudud (O'zbekiston, Xalqaro), turi (Hakaton, Startap dasturi, IT-tanlov) va nom bo'yicha qidiruv. Kartochkada ro'yxat yopilish sanasi, qolgan kunlar, joy (onlayn yoki shahar), jamoa hajmi va mukofot ko'rsatiladi.

10.3. «Ro'yxatdan o'tish» tugmasi tashqi tanlovlar uchun tashkilotchi saytiga yo'naltiradi. Ishtirok shartlari, muddatlar, mukofotlar va ularni to'lash tashkilotchi zimmasida. Ko'rsatilgan sana va mukofot miqdorlari manbadan olinadi va o'zgargan bo'lishi mumkin.

Vaqtlar, agar boshqacha yozilmagan bo'lsa, Toshkent vaqti (UTC+5) bo'yicha ko'rsatiladi.

10.4. Platforma tadbirlarida ishtirok etish tashkilotchi e'lon qilgan nizom bilan tartibga solinadi. Foydalanuvchi tanlovga yuborgan ishlarning muallifligi uchun javobgar. Tanlovga yuborilgan ishlarga bo'lgan huquqlar, nizomda boshqacha ko'rsatilmagan bo'lsa, muallifda qoladi.

10.5. Tadbirlarda foto va video olinishi va ular Platformada e'lon qilinishi mumkin. Bunday holatlar haqida tashkilotchi oldindan xabar beradi.

11. Xabarlar, Fikr bildirish va AI yordamchi

11.1. Foydalanuvchi boshqa foydalanuvchilar bilan shaxsiy suhbat va guruh suhbatlarida (masalan, startap jamoasi guruhi) yozishishi mumkin: matn, fayl (ilova), ovozli xabar va emoji yuborish, suhbatlarni qidirish, bildirishnomalarni o'chirish, xabarning yetkazilgani va o'qilganini ko'rish.

11.2. Operator yozishmalarni uchinchi shaxslarga oshkor qilmaydi, quyidagi hollar bundan mustasno: suhbat ishtirokchisining shikoyati bo'yicha moderatsiya, qonunchilikda belgilangan vakolatli organlarning so'rovi, Platforma xavfsizligini ta'minlash (spam, firibgarlik, zararli fayllarni avtomatik aniqlash).

11.3. Xabarlar orqali spam, ommaviy reklama, tahdid, haqorat, firibgarlik, oldindan to'lov so'rash va Platformadan tashqariga chalg'ituvchi havolalar yuborish taqiqlanadi. Qabul qiluvchi xabar yuboruvchini bloklashi yoki shikoyat qilishi mumkin.

11.4. «Fikr bildirish» bo'limida Foydalanuvchi Operatorga Taklif, Shikoyat, Xato, Savol yoki Rahmat yuborishi va Platformani 1 dan 5 gacha yulduz bilan baholashi mumkin. Murojaat kamida 10 belgidan iborat bo'lishi kerak. Murojaatlar va ularga javoblar «Murojaatlarim» bo'limida saqlanadi. Operator murojaatga 15 kalendar kun ichida javob beradi; qonunchilikda boshqa muddat belgilangan bo'lsa, o'sha muddat qo'llanadi.

11.5. Foydalanuvchi yuborgan takliflardan Operator Platformani yaxshilash uchun haq to'lamasdan foydalanishi mumkin.

11.6. Platformada sun'iy intellekt asosidagi yordamchi (chatbot) va AI funksiyalari mavjud: Platforma bo'yicha savollarga javob, arizalar holati haqida ma'lumot, profil va ariza matnini yozishda maslahat, post matnlarini tayyorlash.

11.7. AI natijalari avtomatik yaratiladi va xato, noto'liq yoki eskirgan bo'lishi mumkin. Ular yuridik, moliyaviy, tibbiy yoki kasbiy maslahat hisoblanmaydi. Foydalanuvchi AI tavsiyasini ishlatishdan oldin uni tekshirishi lozim va natija uchun o'zi javobgar.

11.8. AI maslahatchi faqat Foydalanuvchi uni Sozlamalarda yoqqanda ishlaydi. Bunda AI'ga faqat yo'nalish, ko'nikmalar, tajriba nomlari va Foydalanuvchi o'zi yozgan matn yuboriladi; ism, telefon, elektron pochta, tug'ilgan sana, GPA va manzil yuborilmaydi.

AI xizmatini uchinchi shaxs provayder ko'rsatishi mumkin va uning serverlari O'zbekistondan tashqarida joylashgan bo'lishi mumkin (17-bo'lim).

12. Progress: XP, darajalar, nishonlar va reyting

12.1. Foydalanuvchi Platformadagi haqiqiy faolligi uchun XP oladi: kunlik kirish, kunlik maqsad (15 daqiqa faollik), profilni to'ldirish, startap yaratish, startap jamoasiga qo'shilish, postlarga foydali reaksiyalar olish, izoh yozish, ochiq rolga ariza yuborish, obunachilar to'plash, do'stlarni taklif qilish va boshqa vazifalar. Har bir vazifa uchun XP miqdori «XP qanday olinadi» va «Barcha vazifalar» bo'limlarida ko'rsatiladi.

12.2. Darajalar: Bronza (boshlang'ich), Kumush (1050 XP), Oltin (5550 XP). Yuqori darajalar qo'shimcha imkoniyatlar ochadi (masalan, profilda daraja belgisi va ochiq rollarda ustuvorlik). Darajalar uchun XP chegaralari va imkoniyatlar Operator tomonidan o'zgartirilishi mumkin.

12.3. Kunlik kirish bonusi kuniga bir marta olinadi. Seriya ketma-ket faol kunlar sonini hisoblaydi va bir kun o'tkazib yuborilsa, nolga tushadi. Kalendar va «Shu hafta» grafigi yuklangan XP tarixiga asoslanadi.

12.4. Nishonlar yo'nalishlar bo'yicha (Seriya, Profil, Ilmiy ish, Startap, Keys) uchta darajada (bronza, kumush, oltin) beriladi va ochilgan sana bilan ko'rsatiladi.

12.5. «OTM ichida» va «Umumiy» reytinglar XP bo'yicha tuziladi va boshqa foydalanuvchilarga ko'rinadi (ism, rasm, daraja, OTM, XP).

12.6. XP va boshqa virtual birliklarning huquqiy holati:

• XP, darajalar va nishonlar pul, elektron pul, kriptoaktiv yoki mulk emas;
• ularni pulga almashtirib, sotib, boshqa akkauntga o'tkazib yoki meros qilib bo'lmaydi;
• Operator XP hisoblash qoidalarini o'zgartirishi, xato hisoblangan XPni tuzatishi mumkin;
• sun'iy faollik (bot, bir nechta akkaunt, o'zaro «reaksiya almashish», ma'nosiz izohlar, soxta takliflar) orqali olingan XP bekor qilinadi va 16-bo'limdagi choralar qo'llanadi.

12.7. Foydalanuvchi shaxsiy taklif havolasini (Telegram yoki boshqa usulda) ulashishi mumkin. Do'st havola orqali ro'yxatdan o'tib, profilini kamida 30% to'ldirsa, taklif qiluvchi va do'sti belgilangan XP oladi (hozirda +30 XP va +20 XP). Bosishlar, qo'shilganlar va tasdiqlanganlar statistikasi ko'rsatiladi. Spam usulida havola tarqatish va soxta akkauntlar ochish taqiqlanadi.

12.8. Akkaunt o'chirilganda XP, daraja, nishon va reytingdagi o'rin tiklanmaydigan tarzda yo'qoladi.

13. Sozlamalar

13.1. Foydalanuvchi profil rasmini almashtirishi yoki olib tashlashi (JPEG, PNG yoki WebP, 5 MB gacha), ism-familiya va foydalanuvchi nomini o'zgartirishi mumkin. Yuklangan rasmlardan joylashuv (GPS) metama'lumotlari avtomatik o'chiriladi.

13.2. «Mening apellyatsiyalarim» bo'limida moderatsiya qarorlari ustidan berilgan apellyatsiyalar va ularning holati ko'rsatiladi (16-bo'lim).

13.3. «Faol qurilmalar» bo'limida Foydalanuvchi o'z akkaunti ochiq bo'lgan qurilmalar ro'yxatini (brauzer, operatsion tizim, IP-manzil, oxirgi faollik sanasi) ko'radi, joriy qurilmadan «Chiqish» va boshqa qurilmalarni «Chiqarish» mumkin.

13.4. «A'zolar tavsiyasi» sozlamalari:

• «Meni boshqalarga tavsiya qilish» - hammaga, faqat OTMdoshlarga yoki hech kimga;
• «Ishga ochiq bo'lganimda tasdiqlangan ish beruvchilarga tavsiya qilish»;
• «Reaksiya va izohlarim tavsiyalarimga ta'sir qilsin».

13.5. «Yashirilgan mualliflar va teglar» bo'limida Foydalanuvchi Lentada yashirgan mualliflar va teglar ro'yxatini ko'radi va qayta tiklaydi.

13.6. Shaxsiy ma'lumotlar bo'yicha ixtiyoriy roziliklar (sukut bo'yicha o'chirilgan):

• AI maslahatchi - profil va ariza matnini yozishda yo'nalish, ko'nikmalar, tajriba nomlari va o'zi yozgan matn AI'ga yuboriladi; ism, telefon, elektron pochta, tug'ilgan sana, GPA va manzil hech qachon yuborilmaydi;
• AI modellarini o'qitish - anonimlashtirilgan ma'lumotlar moslashtirishni yaxshilash uchun ishlatilishi mumkin;
• Bitiruvchilar katalogi - bitirgandan keyin OTM bitiruvchilar ro'yxatida ko'rinish;
• Yangiliklar - Platforma yangiliklari va tadbirlari haqida xat olish.

13.7. Foydalanuvchi bu roziliklarni istalgan vaqtda yoqishi yoki o'chirishi mumkin. Rozilikni qaytarib olish avval amalga oshirilgan ishlovning qonuniyligiga ta'sir qilmaydi.

13.8. «Ma'lumotlarimni yuklab olish» funksiyasi orqali Foydalanuvchi profil, arizalar, postlar va boshqa ma'lumotlarini JSON faylda yuklab olishi mumkin.

13.9. Akkauntni o'chirish tartibi 22-bo'limda belgilangan.

14. Foydalanuvchi kontenti va intellektual mulk

14.1. Foydalanuvchi joylagan Kontentga bo'lgan mualliflik va boshqa huquqlar Foydalanuvchida qoladi.

14.2. Kontentni joylash orqali Foydalanuvchi Operatorga butun dunyo bo'ylab amal qiladigan, bepul, mutlaq bo'lmagan, sublitsenziya berish huquqi bilan litsenziya beradi. Unga ko'ra Operator Kontentni Platformada saqlashi, ko'paytirishi, ko'rsatishi, formatini o'zgartirishi (masalan, rasm o'lchami), tarjima qilishi va Platformani ommalashtirishda (Platforma nomini ko'rsatib) ishlatishi mumkin. Litsenziya Kontent o'chirilgunga yoki akkaunt yopilgunga qadar amal qiladi; Kontentning zaxira nusxalari va boshqalar ulashgan nusxalari bundan mustasno.

14.3. Foydalanuvchi o'zi joylagan Kontentga zarur huquqlarga ega ekanini va Kontent uchinchi shaxslarning huquqlarini (mualliflik, tovar belgisi, shaxsiy hayot daxlsizligi, tasvirga bo'lgan huquq) buzmasligini kafolatlaydi.

14.4. Platformaning dasturiy ta'minoti, dizayni, logotipi, «Ilminvest» va «Ilm Invest» nomlari, maskot-personaj, shablonlar, algoritmlar, ma'lumotlar bazasi tuzilmasi va boshqa elementlari Operatorga yoki uning litsenziarlariga tegishli. Ulardan Ofertada ruxsat etilmagan usulda foydalanish taqiqlanadi.

14.5. OTM rasmlari, logotiplari va tavsiflari ularning egalariga tegishli va axborot maqsadida ko'rsatiladi.

14.6. Huquq egasi o'z huquqi buzilgani haqida Operatorga «Fikr bildirish» yoki 23-bo'limdagi elektron pochta orqali xabar berishi mumkin. Xabarda buzilgan huquq, Kontent havolasi va huquqni tasdiqlovchi ma'lumot ko'rsatiladi. Operator asosli xabar bo'yicha Kontentni cheklaydi.

15. Taqiqlangan harakatlar

15.1. Foydalanuvchiga quyidagilar taqiqlanadi:

• O'zbekiston Respublikasi qonunchiligiga zid Kontent joylash, jumladan zo'ravonlik, terrorizm, ekstremizm, milliy, irqiy yoki diniy adovatni targ'ib qiluvchi, pornografik, giyohvand moddalarni targ'ib qiluvchi materiallar;
• boshqa shaxslarni haqorat qilish, kamsitish, ta'qib qilish (bulling), tahdid qilish, ularning obro'siga putur yetkazuvchi yolg'on ma'lumot tarqatish;
• boshqa shaxs, OTM, kompaniya yoki davlat organi nomidan harakat qilish, soxta «tasdiqlangan» maqom ko'rsatish;
• soxta diplom, sertifikat, ilmiy ish, tajriba, yutuq yoki startap ko'rsatkichlarini joylash; boshqalarning ilmiy ishlarini o'ziniki sifatida ko'rsatish (plagiat);
• boshqa shaxslarning shaxsga doir ma'lumotlarini ularning roziligisiz e'lon qilish yoki yig'ish;
• spam, ommaviy reklama, piramida sxemalari, «tez boyish» takliflari, firibgarlik, ish yoki o'qish uchun oldindan to'lov so'rash;
• XP, reyting, reaksiya yoki obunachilarni sun'iy oshirish; bir nechta akkaunt ochish; botlar va avtomatlashtirilgan vositalardan foydalanish;
• Platforma ma'lumotlarini skreping qilish, API'dan ruxsatsiz foydalanish, teskari muhandislik (reverse engineering);
• Platforma xavfsizligini buzishga urinish, zararli dastur yoki havola tarqatish, boshqalarning akkauntiga ruxsatsiz kirish;
• moderatsiya cheklovlarini chetlab o'tish (masalan, bloklangandan keyin yangi akkaunt ochish);
• Platformada topilgan aloqalardan foydalanib, foydalanuvchilarni Platformadan tashqarida aldash;
• akademik halollikni buzuvchi xizmatlarni taklif qilish (kurs ishi, diplom ishi, imtihonni pul evaziga bajarib berish).

15.2. Foydalanuvchilar bir-biriga hurmat bilan munosabatda bo'lishi, munozaralarni fikr va dalil bilan olib borishi, savollarga foydali javob berishga intilishi tavsiya etiladi.

16. Moderatsiya, cheklovlar va apellyatsiya

16.1. Operator Kontentni oldindan tekshirish majburiyatini olmaydi. Moderatsiya shikoyatlar, avtomatik filtrlar va tanlab tekshirish asosida amalga oshiriladi.

16.2. Ofertani buzganlik uchun Operator buzilishning og'irligiga qarab quyidagi choralarni qo'llashi mumkin:

• ogohlantirish;
• Kontentni yashirish yoki o'chirish;
• ayrim funksiyalarni (post, xabar, ariza yuborish) vaqtincha cheklash;
• XP, nishon, daraja yoki «tasdiqlangan» belgisini bekor qilish;
• akkauntni vaqtincha bloklash;
• akkauntni butunlay bloklash va qayta ro'yxatdan o'tishni taqiqlash.

16.3. Qonunchilik buzilishi alomatlari aniqlansa, Operator tegishli ma'lumotlarni vakolatli davlat organlariga qonunchilikda belgilangan tartibda taqdim etishi mumkin.

16.4. Foydalanuvchiga cheklov sababi Platforma interfeysi yoki elektron pochta orqali xabar qilinadi, agar bu tergov yoki boshqa shaxslar xavfsizligiga zarar yetkazmasa.

16.5. Foydalanuvchi moderatsiya qarori, kompetensiya indeksi yoki boshqa avtomatlashtirilgan qaror ustidan qaror olingan kundan boshlab 30 kun ichida Sozlamalar - «Mening apellyatsiyalarim» yoki «Fikr bildirish» orqali apellyatsiya berishi mumkin. Operator apellyatsiyani 15 ish kuni ichida ko'rib chiqadi va asosli qaror bilan javob beradi. Apellyatsiyani dastlabki qarorni qabul qilmagan boshqa xodim ko'rib chiqadi.

16.6. Har bir post, izoh, profil, startap va xabarda «...» menyusi orqali shikoyat yuborish mumkin. Ataylab yolg'on shikoyatlar yuborish ham buzilish hisoblanadi.

17. Shaxsga doir ma'lumotlar

17.1. Operator Foydalanuvchining shaxsga doir ma'lumotlariga «Shaxsga doir ma'lumotlar to'g'risida»gi O'zbekiston Respublikasi Qonuni (O'RQ-547-son) va Maxfiylik siyosatiga muvofiq ishlov beradi. Ofertani akseptlash orqali Foydalanuvchi quyida ko'rsatilgan ma'lumotlarga, ko'rsatilgan maqsadlarda ishlov berishga rozilik beradi.

17.2. Ishlov beriladigan ma'lumotlar:

• ro'yxatdan o'tish ma'lumotlari: ism, familiya, elektron pochta, parol (shifrlangan holda), foydalanuvchi nomi;
• Profil ma'lumotlari: rasm, joylashuv, tug'ilgan sana, ta'lim, tajriba, ko'nikmalar, sertifikatlar, tillar, ilmiy ishlar, ish shartlari, ijtimoiy tarmoq havolalari;
• tashqi xizmatlardan olinadigan ma'lumotlar (LinkedIn, Google, ORCID) - Foydalanuvchi ruxsat bergan hajmda;
• faollik ma'lumotlari: postlar, izohlar, reaksiyalar, arizalar, xabarlar, XP tarixi, qidiruvlar;
• texnik ma'lumotlar: IP-manzil, brauzer, operatsion tizim, qurilma, kirish vaqti, cookie fayllar.

17.3. Ishlov berish maqsadlari: akkaunt yaratish va autentifikatsiya; Platforma funksiyalarini ko'rsatish; vakansiya, startap, tadbir va a'zolarni tavsiya qilish; arizalarni qabul qiluvchilarga uzatish; OTM tasdig'i; xavfsizlik va firibgarlikka qarshi kurash; murojaatlarga javob berish; statistika va Platformani yaxshilash; qonunchilik talablarini bajarish.

17.4. Ma'lumotlar quyidagi shaxslarga uzatilishi mumkin:

• Foydalanuvchi ariza yuborgan yoki kelishuv tuzgan ish beruvchi, startap asoschisi, investor, OTMga - ariza yoki kelishuv uchun zarur hajmda;
• Foydalanuvchining OTMiga - ta'lim, ilmiy ish va yutuqlarni tasdiqlash uchun;
• texnik provayderlarga (xosting, elektron pochta, AI xizmati, tahlil vositalari) - maxfiylik majburiyati asosida;
• vakolatli davlat organlariga - qonunchilikda belgilangan hollarda.

17.5. Operator ma'lumotlarni sotmaydi va reklama maqsadida uchinchi shaxslarga bermaydi.

17.6. O'zbekiston Respublikasi fuqarolarining shaxsga doir ma'lumotlari qonunchilik talablariga muvofiq saqlanadi. Ularni O'zbekistondan tashqariga uzatish (masalan, AI xizmati, LinkedIn yoki Google bilan integratsiya uchun) faqat qonunchilikda (shu jumladan 2026-yil 26-martdagi O'RQ-1125-son Qonun bilan kiritilgan o'zgarishlarda) ruxsat etilgan asoslar va shartlar bajarilganda amalga oshiriladi. Biometrik va genetik ma'lumotlar Platformada yig'ilmaydi.

17.7. Ma'lumotlar akkaunt faol bo'lgan davrda va akkaunt o'chirilgandan keyin qonunchilikda belgilangan muddat (soliq, nizo, xavfsizlik maqsadlari) davomida saqlanadi, so'ngra o'chiriladi yoki anonimlashtiriladi.

17.8. Foydalanuvchi o'z shaxsga doir ma'lumotlari bo'yicha quyidagi huquqlarga ega:

• o'z ma'lumotlari va ularga ishlov berish haqida ma'lumot olish;
• ma'lumotlarni tuzatish va yangilash;
• ma'lumotlarini JSON faylda yuklab olish;
• ishlov berishga rozilikni qaytarib olish;
• ma'lumotlarni o'chirish yoki ishlovni cheklashni talab qilish;
• faqat avtomatlashtirilgan ishlov asosidagi qarorga e'tiroz bildirish;
• shaxsga doir ma'lumotlar sohasidagi vakolatli davlat organiga shikoyat qilish.

17.9. Operator shifrlash, kirish huquqlarini cheklash, zaxira nusxalash va monitoring kabi tashkiliy va texnik choralarni ko'radi.

Ma'lumotlar sizib chiqishi aniqlansa, Operator qonunchilikda belgilangan tartibda Foydalanuvchini va vakolatli organni xabardor qiladi.

17.10. Platforma tizimga kirish holatini saqlash, til va sozlamalarni eslab qolish hamda statistika uchun cookie va shunga o'xshash texnologiyalardan foydalanadi. Foydalanuvchi ularni brauzer sozlamalarida cheklashi mumkin, ammo bu holda ayrim funksiyalar ishlamasligi mumkin.

17.11. Foydalanuvchi o'zi ommaviy qilgan ma'lumotlar (profil, postlar, izohlar) boshqa foydalanuvchilar va qidiruv tizimlariga ko'rinishi mumkinligini tushunadi.

18. Tomonlarning huquq va majburiyatlari

18.1. Foydalanuvchi quyidagi huquqlarga ega:

• Platformaning barcha ochiq funksiyalaridan Oferta shartlariga muvofiq foydalanish;
• o'z Kontenti va Profilini boshqarish, ularning ko'rinishini sozlash;
• arizalarni yuborish, qaytarib olish va holatini kuzatish;
• murojaat, shikoyat va apellyatsiya yuborish, javob olish;
• shaxsga doir ma'lumotlari bo'yicha 17.8-bandda ko'rsatilgan huquqlardan foydalanish;
• Shartnomani istalgan vaqtda akkauntni o'chirish orqali bekor qilish.

18.2. Foydalanuvchi quyidagi majburiyatlarni oladi:

• Oferta, Maxfiylik siyosati va qonunchilikka rioya qilish;
• haqqoniy ma'lumot kiritish va uni dolzarb holda saqlash;
• kirish ma'lumotlari xavfsizligini ta'minlash;
• boshqa foydalanuvchilar, OTMlar va ish beruvchilar huquqlarini hurmat qilish;
• Platforma orqali olgan boshqa shaxslarning ma'lumotlaridan faqat ariza, ish yoki hamkorlik maqsadida foydalanish;
• Platformada xato yoki zaiflik topilsa, undan foydalanmasdan Operatorga xabar berish.

18.3. Operator quyidagi huquqlarga ega:

• Platformani rivojlantirish, funksiyalarni o'zgartirish, qo'shish yoki to'xtatish;
• Ofertani buzgan Foydalanuvchiga 16-bo'limdagi choralarni qo'llash;
• profilaktik ishlar uchun Platformani vaqtincha to'xtatish;
• Foydalanuvchidan ma'lumotlarni tasdiqlovchi hujjat so'rash;
• Foydalanuvchiga Platforma bilan bog'liq xizmat xabarlari, bildirishnomalar va (rozilik bo'lsa) yangiliklarni yuborish;
• Platformada reklama joylash (reklama ekanligini belgilagan holda).

18.4. Operator quyidagi majburiyatlarni oladi:

• Platformaning ishlashini oqilona darajada ta'minlash va nosozliklarni bartaraf etish;
• shaxsga doir ma'lumotlarni himoya qilish;
• murojaat va apellyatsiyalarni belgilangan muddatlarda ko'rib chiqish;
• Oferta o'zgarishlari haqida 22-bo'limga muvofiq xabar berish;
• qonunchilikda belgilangan iste'molchi huquqlariga rioya qilish.

19. Narx va to'lovlar

19.1. Jismoniy shaxslar uchun Platformaning asosiy funksiyalari (ro'yxatdan o'tish, Profil, Lenta, Universitetlar, A'zolar, Vakansiyalar, Arizalar, Startaplar, Tanlovlar, Xabarlar, Progress) bepul taqdim etiladi.

19.2. Kelajakda pullik xizmatlar (masalan, premium imkoniyatlar, sertifikatlash, maxsus kurslar) joriy etilsa, ularning narxi, to'lov tartibi va qaytarish shartlari Foydalanuvchi to'lovni amalga oshirishidan oldin aniq ko'rsatiladi va alohida rozilik olinadi. Bepul funksiyalar 22-bo'limdagi xabardor qilish tartibiga rioya qilinmasdan pullik qilinmaydi.

19.3. Kraudfanding, investitsiya yoki uch tomonlama kelishuvlar bo'yicha mablag'lar Operator hisobidan o'tmaydi va 8.10, 9.9-9.10-bandlarga hamda tegishli alohida shartnomalarga muvofiq hamkor bank orqali amalga oshiriladi.

19.4. Ish beruvchi, startap, tanlov tashkilotchisi yoki boshqa foydalanuvchi Platforma nomidan Foydalanuvchidan pul so'rasa, bu firibgarlik alomatidir. Foydalanuvchi to'lov qilmasdan Operatorga xabar berishi kerak.

20. Javobgarlik va fors-major

20.1. Tomonlar Ofertani bajarmaganlik yoki lozim darajada bajarmaganlik uchun O'zbekiston Respublikasi qonunchiligiga muvofiq javobgar bo'ladi.

20.2. Operator quyidagilar uchun javobgar emas:

• Foydalanuvchilar joylagan Kontent, ularning harakatlari, va'dalari va o'zaro bitimlari;
• ish beruvchilar, OTMlar, investorlar, startap asoschilari va tanlov tashkilotchilarining qarorlari va majburiyatlarini bajarishi;
• tashqi manbalardan olingan vakansiyalar, tanlovlar va OTM ma'lumotlarining aniqligi;
• tashqi xizmatlarning (LinkedIn, Google, ORCID, Telegram, bank va boshqalar) ishlashi;
• algoritm tavsiyalari, kompetensiya indeksi, tayyorlik indeksi va AI natijalari asosida Foydalanuvchi qabul qilgan qarorlar;
• Foydalanuvchi kirish ma'lumotlarini oshkor qilgani sababli yetkazilgan zarar;
• internet, elektr ta'minoti yoki Foydalanuvchi qurilmasidagi nosozliklar.

20.3. Platforma bepul taqdim etilishini hisobga olib, Operator javobgarligi qonunchilikda ruxsat etilgan doirada faqat haqiqiy yetkazilgan to'g'ridan-to'g'ri zarar bilan cheklanadi. Boy berilgan foyda, ish yoki imkoniyatni yo'qotish uchun Operator javob bermaydi. Bu cheklov Operatorning qasddan yoki qo'pol ehtiyotsizlik bilan qilgan harakatlariga va qonunchilikda cheklash taqiqlangan holatlarga tatbiq etilmaydi.

20.4. Foydalanuvchi o'z Kontenti yoki Ofertani buzishi sababli uchinchi shaxslar Operatorga qo'ygan talablar bo'yicha Operatorga yetkazilgan zararni qoplaydi.

20.5. Tomonlar engib bo'lmaydigan kuch holatlari (tabiiy ofatlar, urush, epidemiya, davlat organlarining qarorlari, keng ko'lamli kiberhujumlar, internet va elektr ta'minotidagi umumiy uzilishlar) tufayli majburiyatlarni bajarmaganlik uchun javobgar emas.

Bunday holatlarda majburiyatlarni bajarish muddati holatlar davom etgan vaqtga uzaytiriladi.

21. Nizolarni hal qilish

21.1. Nizolar avvalo muzokaralar yo'li bilan hal qilinadi. Foydalanuvchi «Fikr bildirish» («Shikoyat» turi) yoki 23-bo'limdagi elektron pochta orqali da'vo xati yuboradi. Operator uni 15 kalendar kun ichida ko'rib chiqadi.

21.2. Kelishuvga erishilmasa, nizo O'zbekiston Respublikasi qonunchiligiga muvofiq vakolatli sudda ko'rib chiqiladi. Iste'molchi sifatida Foydalanuvchi qonunchilikda nazarda tutilgan sudlovlik bo'yicha o'z huquqlarini saqlab qoladi.

21.3. Ofertaga O'zbekiston Respublikasi qonunchiligi qo'llaniladi.

22. Amal qilish muddati, o'zgartirish va akkauntni o'chirish

22.1. Shartnoma akseptlangan paytdan kuchga kiradi va muddatsiz amal qiladi.

22.2. Operator Ofertaga o'zgartirish kiritishi mumkin. Yangi tahrir Platformada e'lon qilinadi va undagi sanadan kuchga kiradi.

Foydalanuvchi huquqlarini cheklovchi yoki yangi to'lovlar joriy etuvchi o'zgarishlar haqida Operator kamida 10 kalendar kun oldin Platforma bildirishnomasi yoki elektron pochta orqali xabar beradi. O'zgarish kuchga kirgandan keyin Platformadan foydalanishni davom ettirish yangi tahrirga rozilik hisoblanadi; rozi bo'lmagan Foydalanuvchi akkauntini o'chirishi mumkin.

22.3. Ofertaning oldingi tahrirlari arxivi Platformada saqlanadi.

22.4. Foydalanuvchi Sozlamalar - «Hisobni o'chirish» orqali akkauntini istalgan vaqtda o'chirishi mumkin. Bunda:

• profil, ilmiy ishlar, postlar, izohlar, fayllar, XP va nishonlar butunlay o'chiriladi;
• yuborilgan arizalar ish beruvchida ismsiz «qaytarib olingan» holatda qoladi;
• boshqa foydalanuvchilar bilan yozishmalardagi xabarlar ular tomonida anonimlashtirilgan holda qolishi mumkin;
• asoschi bo'lgan startaplar jamoa a'zosiga topshirilishi yoki yopilishi kerak;
• amaldagi uch tomonlama kelishuv, kraudfanding yoki investitsiya majburiyatlari akkaunt o'chirilishi bilan bekor bo'lmaydi;
• o'chirishdan oldin ma'lumotlarni JSON faylda yuklab olish tavsiya etiladi.

22.5. Operator Foydalanuvchi Ofertani qo'pol yoki takroran buzgan hollarda, shuningdek akkaunt 3 yildan ortiq faol bo'lmaganda (oldindan elektron pochta orqali ogohlantirib) Shartnomani bir tomonlama bekor qilishi mumkin.

22.6. Shartnoma bekor qilingandan keyin ham 14, 17, 20 va 21-bo'limlar o'z kuchini saqlaydi.

23. Yakuniy qoidalar va Operator (oferent) rekvizitlari

23.1. Agar Ofertaning biror bandi haqiqiy emas deb topilsa, bu qolgan bandlarning haqiqiyligiga ta'sir qilmaydi.

23.2. Operatorning biror huquqni amalga oshirmasligi bu huquqdan voz kechish hisoblanmaydi.

23.3. Foydalanuvchi Shartnoma bo'yicha huquq va majburiyatlarini Operator roziligisiz boshqa shaxsga o'tkaza olmaydi.

23.4. Murojaatlar uchun asosiy kanal - Platformadagi «Fikr bildirish» bo'limi.

23.5. Foydalanuvchi ushbu Oferta shartlari bilan to'liq tanishganini, ularni tushunganini va o'zi uchun majburiy deb qabul qilganini

tasdiqlaydi.

24. Operator (oferent) rekvizitlari

Tashkilot nomi: "E-INVESTMENT"

Tashkiliy-huquqiy shakli: Mas`uliyati Cheklangan Jamiyati

STIR (INN): 309838634

Yuridik manzil: Toshkent shahri, Chilonzor tumani Beshyog'och MFY, Islom Karimov ko'chasi, 49-uy

Telefon: +998-93-377-12-83

Elektron pochta: info@e-investment.uz

Rasmiy sahifa manzili (URL): www.e-investment.uz

Ushbu Oferta «Ilminvest» platformasi uchun amal qiladi va Operator tomonidan tasdiqlangan tahrirda kuchga kiradi.

Oferta tahriri: № 1 , tasdiqlangan sana: 28.10.2026